Andijon viloyati “Yagona buyurtmachi xizmati” IK rahbari Muhiddin Qodirov o‘ziga tegishli bo‘lgan Milano Biznes Servis MChJga qariyb 20 milliard so‘mlik qurilishga oid davlat buyurtmalarini olgan. Bu haqda Davlat xaridlari portaliga tayanib “Davletov.uz” Telegram kanali xabar berdi.
Muhiddin Qodirov 2009-yilning 18-aprelida ro‘yxatdan o‘tgan va uy-joylar qurilishi bilan shug‘ullanadigan Milano Biznes Servis kompaniyasining yagona ta’sischisi hisoblanadi.
To‘g‘ridan to‘g‘ri davlat xaridlari ma’lumotlariga ko‘ra, Milano Biznes Servis uchta loyiha bo‘yicha pudratchi etib tanlangan:
- Izboskan tumanidagi 42-sonli maktabni 6,89 milliard so‘mga rekonstruksiya qilish;
- Jalaquduq tumanidagi “Oyim” ko‘p tarmoqli poliklinikasini 6 milliard so‘mga rekonstruksiya qilish;
- Qo‘rg‘ontepa tumanidagi 5-sonli maktabni 6,7 milliard so‘mga rekonstruksiya qilish.
Bundan tashqari “Andijon ihlos qurilish” MChJ Inqirozga qarshi kurashish jamg‘armasi mablag‘laridan amalga oshiriladigan qurilish obyektlari manzilli ro‘yxatidagi taxminan 10,8 milliard so‘mlik davlat buyurtmalarini bajarishga mas’ul qilib belgilangan. Ayni paytda Respublika byudjetidan sog‘liqni saqlash sohasida amalga oshiriladigan manzilli qurilish ro‘yxatidagi 3,2 milliard so‘mlik obyektlar mazkur kompaniyaga berilgan. Shuningdek, mazkur kompaniya Paxtaobod tumanida 26,5 mlrd so‘mlik ikkita 32 kvartirali ko‘p qavatli uyni qurish va tegishli inshootlarni ta’mirlash bo‘yicha tenderda g‘olib bo‘lgan. Tegishli shartnoma 2020-yil 9-noyabrda imzolangan.
“Gazeta.uz”ning aniqlashicha, Andijon Ihlos Qurilish, shuningdek, Shahrixon tumanidagi suv ta’minotini rekonstruksiya qilish bo‘yicha 4,7 milliard so‘mlik va Ulug‘nor tumanidagi Sanitariya-epidemiologiya xizmati bo‘linmasining yangi binosini qurish bo‘yicha 2,7 millard so‘mli tenderlarda g‘olib bo‘lgan.
2020-yilning 30-mart kuni hukumat qarori bilan Andijon viloyati qurilish bosh boshqarmasi boshlig‘i lavozimiga tayinlangan Rustambek Tojiboyevich Xojiboyev hali ham Ixtisoslashgan Shahrixon Qurilish MCHJ ulushlariga to‘liq egalik qiladi.
Mazkur kompaniya amaldorning yangi lavozimdagi davrida ham milliardlik shartnomalarni olishda davom etgan. Masalan, sog‘liqni saqlash sohasida respublika budjetidan bajariladigan 18,73 milliard so‘mlik qurilish obyektlari aynan Rustambek Xojiboyevning kompaniyasiga nasib qilgan. Masalan, 2020-yilning 2-oktabr kuni imzolangan pudrat shartnomasiga binoan, Ixtisoslashgan Shahrixon Qurilish MChJ Shahrixon tumani 2-tug‘uruq majmuasini qariyb 5,6 milliard so‘mga rekonstruksiya qilishi zarur. Bu kompaniya tumandagi 1-tug‘uruq majmuasini ham yakuniy qiymati qariyb 12,8 milliard so‘mga rekonstruksiya qilib keladi.
“Davlat xaridlari to‘g‘risida”gi qonunning 5-moddasiga ko‘ra, manfaatlar to‘qnashuvi mavjud bo‘lgan taqdirda, xarid qilish tartib-taomillarini tashkil etish va o‘tkazish uchun javobgar bo‘lgan shaxs bajariladigan vazifalardan chetlashtirilishi lozim.
“Korrupsiyaga qarshi kurashish to‘g‘risida”gi qonunning 21-moddasiga asosan, davlat organlarining xodimlari mansab yoki xizmat majburiyatlarini bajarish chog‘ida manfaatlar to‘qnashuviga olib keladigan yoki olib kelishi mumkin bo‘lgan shaxsiy manfaatdorlikka yo‘l qo‘ymasligi kerak.
Korrupsiyaga qarshi kurashish agentligining ma’lum qilishicha, agentlik Andijon viloyatidagi manfaatlar to‘qnashuvi yuzasidan o‘rganish ishlarini boshlagan.
Izoh (0)