Futbol bo‘yicha Osiyo Chempionlar Ligasi guruh bosqichining 5-tur bellashuvlariga yakun yasaldi.
Turnirning “A” guruhida ishtirok etayotgan Toshkentning “Lokomotiv” klubi BAAda “An-Nasr” mehmoni bo‘lib, 1:1 hisobida durang o‘ynadi. Qo‘lga kiritilgan 1 ochko “temiryo‘lchilar”ga guruh peshqadamligini saqlab qolish imkonini berdi.
“Lokomotiv” so‘nggi turni o‘z maydonida “An-Nasr”ga qarshi o‘tkazadi. O‘sha uchrashuvdagi durang natija ham Toshkent klubini tarixda birinchi bor Osiyo Chempionlar Ligasining nimchorak finaliga olib chiqadi.
Poytaxtning boshqa bir klubi “Bunyodkor” esa xalqaro maydonni muddatidan oldin tark etdi. Qatorasiga ikkinchi mavsumda Sergey Lushchan klubni guruh bosqichidan muvaffaqiyatli olib o‘tolmadi.
Qayd etish kerak, Osiyo Chempionlar Ligasining Toshkentda bo‘lib o‘tgan so‘nggi olti o‘yinida “Bunyodkor” raqiblarini nafaqat mag‘lub eta olmadi, balki bitta ham gol urishning uddasidan chiqmadi.
Shu tariqa klub o‘z tarixida navbatdagi antirekordni o‘rnatib, 540 davomida o‘z maydonida Osiyo klublari darvozasiga yo‘l topa olmadi. So‘nggi tur natijasidan qat’iy nazar “Bunyodkor” Chempionlar Ligasining navbatdagi bosqichiga chiqa olmaydi.
Osiyo Chempionlar Ligasi “A” guruhi. 5-tur 20-aprel, chorshanba
“An-Nasr” (BAA) — “Lokomotiv” (O‘zbekiston) 1:1
Gollar: Jires Kembo Ekokko, 31 (1:0). Temurxo‘ja Abduxoliqov, 43 (1:1).“Lokomotiv”: Ignatiy Nesterov, Oleg Zoteyev, Salim Mustafoyev, Islom To‘xtaxo‘jayev (Sergey Proxorov, 46), Sherzod Fayziyev, Server Jeparov, Timur Kapadze, Sanjar Shoahmedov, Marat Bikmayev, Temurxo‘ja Abduxoliqov (Ivan Nagayev, 86), Sardor Mirzayev (Jasur Hasanov, 73).Osiyo Chempionlar Ligasi “B” guruhi. 5-tur 20-aprel, chorshanba
“Bunyodkor” (O‘zbekiston) — “Lahviya” (Qatar) 0:2
Gollar: Karim Budiaf, 65 (0:1). Muhammad Muntari, 79 (0:2).“Bunyodkor”: Murod Zuxurov, Akmal Shorahmedov, Yuritsa Bulyat, Akrom Komilov, Rustam Ashurmatov, Javlon Ibrohimov, Otabek Shukurov (Shaker Zuagi, 69), Sato Minori, Eldor Shomurodov, Bahodir Nasimov (Shahzod Nurmatov, 46), Doston Hamdamov (Zabihillo O‘rinboyev, 78).
Izoh (0)