Tailandda Songkran festivali bo‘lib o‘tgan bir hafta mobaynida 440 dan ortiq odam avtohalokatlar qurboni bo‘ldi

Tailandda mahalliy Yangi yilning kirib kelishi bilan bog‘liq Songkran suv festivali nishonlangan bir hafta mobaynida insonlarning o‘limiga olib kelgan yo‘l-transport hodisalari ko‘plab kuzatildi. Bu haqda mamlakat ichki ishlar vaziri Anupong Paochindaning matbuot anjumanidagi so‘zlariga tayangan holda “TASS” xabar bermoqda.

Qirollikdagi eng asosiy bayramlardan biri bo‘lgan Songkran munosabati bilan umummilliy ta’til 13–17-aprel kunlariga belgilangan edi. Ammo ko‘plar bayramni 11-aprel, dushanbadan nishonlay boshladi. Yetti kun ichida yo‘llarda 3447 avariya ro‘y berib, ularda 442 kishi halok bo‘ldi, 3656 kishi jarohat oldi.

Ichki ishlar vazirining qayd qilib o‘tishicha, aksar hollarda YTHga mast holda avtomobil boshqarish sabab bo‘lgan.

O‘tgan yilgi Songkran kunlari insonlarning o‘limiga olib kelgan avtohalokatlar miqdori bu safargidan 20 foizga kamroq bo‘lgan edi.