2016-yil 15-aprelda Vazirlar Mahkamasining birinchi chorakda respublikani ijtimoiy-iqtisodiy rivojlantirish yakunlarini muhokama qilishga va O‘zbekiston Respublikasi Prezidenti Islom Karimov tomonidan 15-yanvarda respublika hukumati majlisida belgilab berilgan 2016-yilga mo‘ljallangan iqtisodiy dasturning eng muhim yo‘nalishlari va ustuvor vazifalari amalga oshirilishini baholashga bag‘ishlangan majlisi bo‘lib o‘tdi. Bu haqda O‘zA xabar berdi.
Yig‘ilish asnosida ma’lum qilinishicha, joriy yilning birinchi choragida mamlakatning yalpi ichki mahsuloti 7,5 foizga o‘sdi. Sanoat mahsuloti ishlab chiqarish hajmi 7 foizga, qishloq xo‘jaligi mahsulotlari yetishtirish hajmi 6,7 foizga, chakana tovar aylanmasi hajmi 12,8 foizga ko‘paydi.
Shuningdek, davlat budjeti yalpi ichki mahsulotga nisbatan 0,1 foiz miqdoridagi profitsit bilan ijro etilgani ma’lum qilindi.
Inflyatsiya darajasi prognoz parametrlardan oshmadi.
Izoh (0)