11-aprel, dushanba kuni Afg‘oniston poytaxti Kobul shahrida atoqli shoir, olim va davlat arbobi Alisher Navoiyning 575 yilligi munosabati bilan tashkil etilgan xalqaro simpozium bo‘lib o‘tdi. Tadbirda chiqish qilgan mamlakat prezidenti Ashraf G‘ani Ahmadzay ushbu sana munosabati bilan Alisher Navoiy sharafiga yangi rasmiy davlat mukofoti ta’sis etilishi to‘g‘risidagi farmonni imzolaganini ma’lum qildi, deb xabar beradi Pajhwok Afghan News axborot agentligi.
“Eski ilm-fanimiz va madaniyatimiz vakillarining kitob va maqolalaridan tegishli xulosalar qilish va ularning xotirasini yod etish bizning burchimizdir”, — dedi Ashraf G‘ani xalqaro simpoziumdagi chiqishida.
Shuningdek, prezident Alisher Navoiy XV asrning eng yirik madaniyat va siyosat arboblaridan biri bo‘lganligini qayd qilib o‘tdi.
O‘z navbatida, Afg‘oniston prezidentining o‘rinbosari, mamlakatdagi o‘zbek jamoasi yetakchisi general Abdulrashid Do‘stum buning uchun prezidentga minnatdorchilik bildirdi.
Tadbirda Navoiy merosini o‘rganib kelayotgan bir qator olimlar, jumladan, turkiyalik madaniyatshunos, doktor Abdulrahmon Kundal, Pokistondagi Panjob universiteti professori, doktor Ali Komil Qizilbosh, Hindistondagi Dehli universiteti fors tili fakulteti professori, doktor Sharif Husayn Qosimiy, shuningdek, O‘zbekiston va Tojikiston vakillari — Abdulla A’zam va Anvar Muhammad Adib Hamnavoiy o‘z ma’ruzalari bilan ishtirok etdi. Ular Navoiy merosiga yuksak baho berib, uning jahon madaniyati oldidagi xizmatlarini e’tirof etdi.
“Bizda Mavlono Jaloliddin Muhammad Balxiy (Mavlono Rumiy) devoni va Navoiy kitoblari muhabbat bilan o‘qiladi. Ochig‘ini aytganda, Navoiyning xizmatlari beqiyosdir”, — dedi doktor Sharif Husayn Qosimiy.
Izoh (0)