Xitoyda temir yo‘llar qurilishi uchun 2016-yilda 800 milliard yuandan ziyod (124 milliard dollar atrofida) mablag‘ investitsiya qilinishi rejalashtirilmoqda. Bu haqda mamlakat Davlat kengashi vitse-premyeri Ma Kay ma’lum qildi, deya xabar beradi “Interfaks”.
Vitse-premyerning bildirishicha, 2015-yilda mamlakatda faoliyat ko‘rsatayotgan temir yo‘llarning umumiy uzunligi 121 ming kilometrga (jumladan, 19 ming kilometr tezkor temir yo‘llar) yetgan. Sohaga kiritilgan investitsiyalar 820 milliard yuanni tashkil etgan va buning natijasida 9 ming kilometrdan ziyod temir yo‘l foydalanishga topshirilgan.
2016-yilda asosiy e’tibor tezkor temir yo‘llar tarmog‘ini mukammallashtirish, shahar va shaharchalar o‘rtasida yangi temir yo‘llar qurilishi, yuk temir yo‘llari tarmog‘ini shakllantirishni tezlashtirish va temir yo‘llardan foydalanish darajasini oshirishga qaratilishi bildirilmoqda.