Vyetnam prezidenti Chiong Tan Shang Milliy Majlisda o‘tkazilgan ovoz berish natijalariga ko‘ra lavozimidan ozod etildi. Bu haqda, “Sinxua” agentligiga asoslanib, “RIA Novosti” xabar bermoqda.
Ma’lum bo‘lishicha, 473 ovoz berish byulletenining 447 tasida uni prezidentlikdan bo‘shatish talabi izhor etildi.
Chiong Tan Shang yanvar oyi oxirida bo‘lib o‘tgan saylovda kommunistik partiya markaziy qo‘mitasi tarkibiga kira olmagan edi.
Milliy Majlis raisi etib saylangan Nguyen Txi Kim Ngan xonim shanba, 2-aprelda o‘tkazilishi mo‘ljallangan saylovda ishtirok etadigan yagona nomzod sifatida jamoat xavfsizligi vaziri, general Chan Day Kuangni ko‘rsatdi.
Mamlakat poytaxti Xanoyda shu kunlarda Milliy Majlis sessiyasi bo‘lib o‘tmoqda. Unda ijroiya hokimiyati rahbarlik tarkibi saylanadi. Yaqin kunlarda parlamentda yangi prezident va bosh vazir saylovlari bo‘lib o‘tadi. Bu mansablarni Chan Day Kuang hamda amaldagi bosh vazirning o‘rinbosari Nguyen Suan Fuk egallashi kutilmoqda. Ularning ikkisi ham mamlakat kommunistik partiyasi markaziy qo‘mitasi a’zosidir.
Izoh (0)