Futbol bo‘yicha JCh—2018 va Osiyo Kubogi—2019 saralashi doirasidagi O‘zbekiston — Bahrayn o‘yini oldidan 28-mart kuni tashkil etilgan matbuot anjumani mezbonlar bosh murabbiyi Samvel Babayan jurnalistlarning savollariga javob qaytardi, deb yozadi “Сhampionat.asia”.
Babayan Bahraynga qarshi o‘yinda jamoasi g‘alaba uchun harakat qilishini aytarkan, odatda jamoasi o‘yinidan qoniqmasligiga urg‘u berdi
“Menimcha, hech bir mutaxassis o‘z jamoasi o‘yinidan qoniqmasa kerak. Ammo futbolchilar o‘zlarini ko‘rsatishga urinishadi. Hech bir jamoa doimiy ravishda hujumkor o‘yin ko‘rsata olmaydi. Ertaga g‘alaba qozona olsak, bundan xursand bo‘laman”, — dedi Samvel Babayan.
Babayan milliy terma tarkibidagi yo‘qotishlar haqida fikr bildirarkan, “Lokomotiv” vakili Islom To‘xtaxo‘jayev Filippinga qarshi o‘yinda olgan jarohati sabab, Bahraynga qarshi maydonga tusha olmasligi mumkinligini aytib o‘tdi.
Murabbiy Bahrayndagi hamkasbi Serxio Batista haqida iliq fikrlar bildirib, raqib kuchli murabbiyga ega ekanini alohida ta’kidladi. Samvel Babayanning fikricha, Bahrayn futbolida pasayish yo‘q: “Bahrayn kuchsizlandi, deya olmayman. Ular hamon kuchli tarkibga ega”.
Eslatib o‘tamiz, O‘zbekiston — Bahrayn uchrashuvi 29-mart, seshanba kuni Toshkent vaqti bilan 18:00 da “Bunyodkor” stadionida boshlanadi.
Izoh (0)