Futbol bo‘yicha O‘zbekiston va Bahrayn terma jamoalari Toshkentda uch bor to‘qnash kelgan va mazkur uchrashuvlarning barchasi jahon chempionati saralash bahslari doirasida bo‘lib o‘tgan. JCh—2018 va Osiyo Kubogi—2019 saralashi doirasida 29-mart, seshanba kuni bo‘ladigan bellashuv bu borada to‘rtinchisi hisoblanadi.
Tomonlar Toshkentda birinchi bor 2005-yilning 3-sentabr kuni o‘zaro bahs olib borgan. Yaponiyalik hakam Toshimitsu Yoshida boshqargan bellashuvda Mirjalol Qosimovning yagona goli O‘zbekistonga g‘alaba keltirgan.
Biroq mazkur o‘yindagi hakamlik borasida O‘FFning e’tirozidan so‘ng, FIFA uchrashuv natijasini bekor qilgan. Shundan kelib chiqib, O‘zbekiston terma jamoasi o‘z maydonida Bahraynni mag‘lub etmagan, deyish ham mumkin.
2005-yilning 8-oktabr kuni Toshkentda bo‘lib o‘tgan takroriy o‘yinda 1:1 hisobi qayd etilgan. Talal Yusuf tomonidan urilgan golga Maksim Shatskix javob qaytargan.
Toshkent shahrida bo‘lib o‘tgan uchinchi o‘yinda Bahrayn 1:0 hisobida muvaffaqiyat qozongan. 2009-yilning 11-fevral kungi o‘yinda Mahmud Abdurahmon 90+4-daqiqada jarima zarbasini aniq amalga oshirib, Bahraynning O‘zbekiston ustidan safardagi birinchi g‘alabasiga sababchi bo‘lgan.
Eslatib o‘tamiz, O‘zbekiston — Bahrayn uchrashuvi 29-mart, seshanba kuni Toshkent vaqti bilan 18:00 da “Bunyodkor” stadionida boshlanadi.
Izoh (0)