Futbol bo‘yicha JCh—2018 va Osiyo Kubogi—2019 saralashi doirasidagi O‘zbekiston — Bahrayn uchrashuvi oldidan mehmonlar bosh murabbiyi Serxio Batista jurnalistlarning savollariga javob berdi. Mutaxassis 28-mart kuni tashkil etilgan matbuot anjumaniga futbolchi Hasan al-Avsvad bilan birga tashrif buyurdi, deb yozadi “Championat.asia”.
“Yamanga qarshi o‘yindan so‘ng futbolchilarimiz tiklanishga ulgurdi, ular O‘zbekiston bilan bellashish uchun tayyor. Raqibimiz kuchli, ammo Bahrayn Toshkentga uch ochko olish uchun keldi. Falsafamizni o‘zgartirmadik, maqsadimiz faqat g‘alaba uchun maydonga tushish”, — dedi Serxio Batista.
1986-yilgi jahon chempionining Toshkentda ko‘rib turganidan xursandligini yashira olmagan o‘zbekistonlik jurnalist Bahrayn terma jamoasi JCh—2018 yo‘llanmasidan umidini uzib bo‘lganiga urg‘u berib, buning sababini izohlashni so‘radi.
“O‘zbekistonda ekanimdan men ham xursandman, Sizga rahmat! Bahraynga kelganimga 10 oy bo‘ldi. Bu vaqt ichida nafaqat Bahraynda, balki butun dunyoda futbol o‘zgardi. Endi futbol yanada kuchli bo‘lishni talab etmoqda. Bahrayn futbol federatsiyasi rahbari bilan mamlakat futbolini rivojlantirish yo‘lida ishlashga harakat qilyapmiz”, — dedi Serxio Batista.
Matbuot anjumaniga kelgan bahraynlik futbolchi Hasan Al-Asvadga o‘zbekistonlik jurnalistlar A’lo Xubayl, Talal Yusuf kabi futbolchilarni eslatib, hozirda ularga munosib o‘rinbosar yo‘qligi borasida savol berdi.
“Siz aytgan o‘yinchilar Bahrayn futboli yulduzlari edi. Biz ularga havas qilib, katta bo‘lganmiz. Hozir yoshlar ko‘p, jamoada Batista ishlashda davom etsa, Xubayl kabi futbolchilar yana yetishib chiqadi”, — dedi Hasan al-Asvad.
Eslatib o‘tamiz, O‘zbekiston — Bahrayn uchrashuvi 29-mart, seshanba kuni Toshkent vaqti bilan 18:00 da “Bunyodkor” stadionida boshlanadi.
Izoh (0)