Belgiya politsiyasi Bryussel aeroportidagi teraktning uchinchi ishtirokchisini qo‘lga oldi. Hujumdan bir necha soat o‘tib, chop etilgan videoda ko‘zga tashlangan “shlyapali erkak” mustaqil jurnalist Faysal Sheffu bo‘lib chiqdi, deb xabar beradi “RBK”.
Avvalroq Belgiyaning Derniere Heure gazetasi Bryussel aeroportidagi portlashlarni amalga oshirgan deb taxmin qilinayotgan shaxslarning fotosuratini e’lon qilgan edi. Ammo keyinroq fotosuratda aka-uka Bakraviylar yonida ketayotgani qayd etilgan shaxs portlashlarga aloqadorlikda gumon qilinayotgan Najim Laashraviy bo‘lib chiqmagani aytilgan edi.
25-mart, juma kuni Faysal Sheffu politsiya tomonidan qo‘lga olindi, 26-mart kuni esa u teraktlar uyushtirish, qotillik va qotillikka urinishda ayblandi.
Belgiyaning Le Soir gazetasi bergan ma’lumotga ko‘ra, Sheffu hamda uning ikki sherigini aeroportga olib kelgan taksichining ko‘rsatmalari asosida uning shaxsini aniqlashga muvaffaq bo‘lingan.
Gumondorning uyidan qurollar yoki portlovchi moddalar topilmagan.
Faysal mustaqil jurnalist bo‘lib, xususan, Journal du Musulman nashrida maqolalar chiqarib borgan.
Eslatib o‘tamiz, oldinroq Bryussel aeroportidagi bombani aka-uka Bakraviylar portlatgani xabar qilingandi.
Politsiya ma’lumotlariga ko‘ra, aeroportdagi portlashga jami uch kishi aloqador bo‘lgan, ulardan ikki nafari halok bo‘lgan, uchinchisi aerovokzal binosidan qochib qolgan.
22-mart, seshanba kuni Belgiya poytaxtining aeroporti va metrosida qator portlashlar sodir etildi. Natijada, so‘nggi ma’lumotlarga ko‘ra, 36 kishi halok bo‘ldi, 230 kishi jarohat oldi.
Izoh (0)