“Barselona” jamoasi muxlislari klub stadioni “Kamp Nou”ni afsonaviy gollandiyalik futbolchi va murabbiy Yoxan Kroyff sharafiga nomlashni taklif qildi va Twitter’da maxsus #EstadiJohanCruyff heshtegini yaratdi, deb xabar beradi “Chempionat”.
O‘pka saratoniga qarshi bir necha yildan buyon kurash olib borgan Yoxan Kroyff kecha, 24-mart kuni 68 yoshida vafot etdi.
Shuningdek, Manifest Blaugrana nomli muxlislar guruhi “Kamp Nou” stadionining kirish qismlaridan birida Yoxan Kroyff haykalini o‘rnatish hamda muzey nomini uning sharafiga o‘zgartirish taklifi bilan chiqdi.
Yoxan Kroyff futbolchi sifatida 1973-yildan boshlab besh yil davomida “Barselona” safida o‘ynab, bir martadan Ispaniya chempioni va Ispaniya Kubogi sohibi bo‘ldi. Futbolchilik faoliyatini yakunlaganidan so‘ng, u 1988-yildan 1996-yilga qadar “Barselona” bosh murabbiyi sifatida ishlagan. Ushbu vaqt mobaynida Kroyff kataloniyaliklarni to‘rt karra Ispaniya chempioni, uch karra Ispaniya Superkubogi va Ispaniya Kubogi sohibiga aylantirdi. Shuningdek, gollandiyalik mutaxassis qo‘li ostida “Barselona” Chempionlar Ligasi va UEFA Superkubogi sohibi bo‘lgan.
Izoh (0)