Kecha, 24-mart kuni O‘zbekiston terma jamoasi JCh—2018 hamda Osiyo Kubogi—2019 saralashi doirasida Filippinga qarshi bahs olib bordi va 1:0 hisobida g‘alaba qozondi. Uchrashuvdan so‘ng O‘zbekiston terma jamoasi hujumchisi Aleksandr Geynrix bo‘lib o‘tgan o‘yin haqida o‘z fikrlarini bildirib o‘tdi, deb xabar beradi “Sports.uz”.
“Ko‘plab vaziyatlar yaratdik, ammo ulardan unumli foydalana olmadik. Raqib darvozasiga ko‘proq gol urib, muxlislarni xursand qilish niyatimiz bor edi. Qandaydir tushunarsiz sabablarga ko‘ra, to‘p Filippin darvozasidan joy olgisi kelmadi. Bunday o‘yinlar ba’zida bo‘lib turadi. Yaxshiyamki, gol urib, 3 ochkoni ishlab oldik va guruh peshqadamiga aylandik. Golli uzatmaga e’tibor bermaslikni ma’qul ko‘rgan bo‘lardim. Eng asosiysi – bu g‘alaba. Navbatdagi o‘yinni Bahraynga qarshi o‘tkazamiz. Filippinga urmagan gollarimizni bo‘lajak o‘yinda uramiz, deb umid qilaman. Arablarga qarshi o‘yin oson kechmasligi aniq, lekin eng yuqori tayyorgarlik bilan maydonga tushamiz”, – deydi Aleksandr Geynrix.
Eslatib o‘tamiz, Filippin ustidan erishilgan g‘alabadan so‘ng O‘zbekiston terma jamoasi “H” guruhida ochkolar sonini 18 taga yetkazib, guruh peshqadamiga aylanib oldi. Ikkinchi o‘rinda borayotgan Shimoliy Koreya termasi hisobida 16 ochko mavjud.
Ma’lumot uchun, 24-mart, payshanba kuni “H” guruhida Bahrayn o‘z maydonida Yaman futbolchilarini qabul qilib, 3:0 hisobida g‘alaba qozondi.
Mavzuga oid:
Izoh (0)