Futbol bo‘yicha O‘zbekiston va Filippin terma jamoalari o‘rtasidagi 24-mart kuni bo‘lib o‘tadigan JCh—2018 va Osiyo Kubogi—2019 saralash uchrashuvi oldidan ikki terma jamoa bosh murabbiylari ishtirokida matbuot anjumani tashkil etildi. “Championat.asia” xabariga ko‘ra, anjumanning ikkinchi qismida O‘zbekiston milliy terma jamoasi bosh murabbiyi Samvel Babayan jurnalistlarning savollariga javob qaytardi.
“Filippin termasiga hurmat bilan munosabatda bo‘lamiz. Ularda bosh murabbiy kuchli. Ertaga kuchli o‘yin ko‘rsatib, g‘alaba qozonishga harakat qilamiz. Bizga uch ochko juda kerak. Shu bois asosiy maqsad g‘alaba qozonish”, — dedi O‘zbekiston milliy terma jamoasi bosh murabbiyi.
JCh—2018 saralashining Toshkentda o‘tgan avvalgi ikki turiga “Paxtakor” stadioni mezbonlik qilgandi, navbatdagi o‘yinlar esa “Bunyodkor” stadionida bo‘lib o‘tadi. “Avval ham ‘Bunyodkor’da o‘ynashni istagandik, biroq o‘shanda maydon holati qoniqarli emasdi. Hozir esa barchasi ideal”, — dedi milliy terma jamoa ustozi.
Samvel Babayan “Lokomotiv” a’zosi Sardor Mirzayevga nima uchun javob berib yuborilgani haqidagi savolga javob berdi: “Mirzayev mavsumni juda yaxshi boshladi. Osiyo Chempionlar Ligasida ham, Oliy Ligada ham yaxshi o‘yinlar ko‘rsatdi. Shu boisdan ham terma jamoa yig‘iniga chaqirildi. U hali ham terma jamoaga nomzod futbolchi. Unga imkoniyat beramiz”.
Yarim himoyachi Stanislav Andreyevning terma bilan birga bo‘lib turganini izohlashda Babayan “Lokomotiv” futbolchisi Jasur Hasanovni misol qilib keltirdi: “Jasur Hasanov ham OChLda o‘ynamadi, lekin uni ham chaqirdim. Aytmoqchimanki, terma jamoaga barcha kuchli futbolchilarni chaqiramiz. Bu menga yoki boshqaga qarashli jamoa emas, bu xalqimizning jamoasi”.
Jurnalistlarning g‘alaba uchun mukofot puli berilishi borasidagi savoliga Samvel Babayan shunday javob berdi: “Bu jamoa siri. Mirabror Usmonov boshchiligidagi terma jamoaga e’tibor juda katta. Ishoning, har bir futbolchi pul uchun emas, Vatan uchun maydonga tushadi”.
“Biz terma jamoaga futbolchi jalb qilishda geografiyaga qaramaymiz, u Farg‘onada o‘ynaydimi yoki Qashqadaryoda — farqi yo‘q. Kimda O‘zbekiston pasporti bo‘lsa, unda terma jamoaga chaqirilish imkoniyati bor”, — deb, Babayan Farg‘ona vodiysi klublaridan terma jamoaga futbolchilar jalb etilmayotgani borasidagi savolga javob berdi.
Avvalroq Filippin milliy terma jamoasi bosh murabbiyi Tomas Duli O‘zbekistonga qarshi o‘yin oldidan o‘z fikrlari bilan o‘rtoqlashgan edi. Eslatib o‘tamiz, O‘zbekiston — Filippin uchrashuvi 24-mart, payshanba kuni Toshkent vaqti bilan soat 18:00 da boshlanadi.
Izoh (0)