17-mart kuni Samvel Babayan bosh murabbiyligidagi futbol bo‘yicha O‘zbekiston milliy terma jamoasi JCh–2018 ikkinchi saralash bosqichi so‘nggi ikki o‘yinidan oldin yig‘inga kirishdi. Avvalroq esa Samvel Babayan JCh–2018 Filippin va Bahraynga qarshi o‘yinlar uchun chaqirilgan futbolchilarning kengaytirilgan ro‘yxatini ma’lum qilgan edi.
O‘zbekiston futbol federatsiyasi matbuot xizmatining ma’lum qilishicha, ushbu futbolchilar ro‘yxatiga kiritilgan terma jamoaning ikki nafar a’zosi – “Bunyodkor” klubining hujumkor yarim himoyachisi Dostonbek Hamdamov hamda “Paxtakor” jamoasi a’zosi Jaloliddin Masharipov sog‘lig‘idagi muammolar tufayli terma jamoa lagerini tark etdi.
Hamdamov davolanish kurslariga ehtiyoji bor bo‘lgani sabab terma jamoa bilan mashg‘ulotlarni to‘xtatishiga to‘g‘ri keldi. Uning o‘rniga “Bunyodkor”ning boshqa bir futbolchisi – Akrom Komilov terma jamoa mashg‘ulotlariga jalb etildi. Jaloliddin Masharipovning terma jamoa mashg‘ulotlari davomida jarohati bezovta qildi va unga ham murabbiylar shtabi davolanish uchun javob berdi.
O‘zbekiston milliy terma jamoasining Jahon chempionati–2018 ikkinchi saralash bosqichi doirasidagi so‘nggi ikki o‘yini Toshkentdagi “Bunyodkor” stadionida o‘tkaziladi. O‘zbekiston milliy terma jamoasining 24-mart kuni Filippinga qarshi hamda 29-mart kuni Bahraynga qarshi bo‘ladigan o‘yinlari 18:00 da start oladi.
Eslatib o‘tamiz, so‘nggi ikki o‘yin oldidan O‘zbekiston terma jamoasi olti uchrashuv o‘tkazib, 15 ochko to‘plagan holda “H” guruhida ikkinchi o‘rinni egallab turibdi. Guruhda hozircha 7 uchrashuvda 16 ochko jamg‘argan KXDR terma jamoasi peshqadamlik qilmoqda.
Izoh (0)