Samvel Babayan bosh murabbiyligidagi futbol bo‘yicha O‘zbekiston milliy terma jamoasi JCh–2018 ikkinchi saralash bosqichi so‘nggi ikki o‘yinidan oldin yig‘inga kirishdi, deb xabar bermoqda O‘zbekiston futbol federatsiyasi matbuot xizmati.
Ayni damda terma jamoa yig‘iniga chaqirilgan futbolchilar Toshkentga yetib keldi. Faqatgina, Rossiya chempionatida to‘p surayotgan Odil Ahmedov (“Krasnodar”) va Vitaliy Denisov (“Lokomotiv”), shuningdek, Qatarning “Al-Jaish” safida Osiyo Chempionlar Ligasi guruh bosqichi 3-turida Qarshining “Nasaf” klubiga qarshi maydonga tushib, jamoasiga g‘alaba keltirgan Sardor Rashidov yig‘inga keyinroq kelib qo‘shiladi.
Milliy terma jamoa bosh murabbiyi Samvel Babayan mazkur yig‘inda ishtirok etadigan futbolchilarning kengaytirilgan tarkibini avvalroq e’lon qilgan edi.
Ta’kidlash kerakki, O‘zbekiston milliy terma jamoasining Jahon chempionati–2018 ikkinchi saralash bosqichi doirasidagi so‘nggi ikki o‘yini Toshkentdagi “Bunyodkor” stadionida o‘tkaziladi. O‘zbekiston milliy terma jamoasining 24-mart kuni Filippinga qarshi hamda 29-mart kuni Bahraynga qarshi bo‘ladigan o‘yinlari 18:00 da start oladi.
Eslatib o‘tamiz, so‘nggi ikki o‘yin oldidan O‘zbekiston terma jamoasi olti uchrashuv o‘tkazib, 15 ochko to‘plagan holda “H” guruhida ikkinchi o‘rinni egallab turibdi. Guruhda hozircha 7 uchrashuvda 16 ochko jamg‘argan KXDR terma jamoasi peshqadamlik qilmoqda.
Izoh (0)