Rossiya prezidenti Vladimir Putinning ma’lumot berishicha, Suriyadagi harbiy operatsiyaga mamlakat mudofaa vazirligi budjetidan 33 milliard rubl sarflangan. Bu haqda Meduza xabar bermoqda.
Operatsiya yakunlari haqida gapirarkan, Putin Rossiya “vaziyatni tubdan o‘zgartirgani”ni ta’kidladi.
“Biz terror o‘simtasining ildiz otishiga yo‘l qo‘ymadik, jinoyatchilarning zaxiralari, qurol va o‘q-dori saqlanadigan omborxonalari vayron qilindi, terrorchilarning asosiy moliyaviy ozuqasi bo‘lgan neft kontrabandasi yo‘nalishlari to‘sildi”, — dedi u Suriyadagi maxsus operatsiyada namuna ko‘rsatgan harbiylarga davlat mukofotlarini topshirish marosimidagi chiqishida.
Shuningdek, Putin Suriyadagi qonuniy davlatchilikni mustahkamlash yo‘lida katta ishlar amalga oshirilganini alohida qayd qilib o‘tdi. U Suriyaga har tomonlama yordam ko‘rsatish, shu jumladan, harbiy operatsiyalarga Rossiya aviatsiyasini jalb qilishga va’da berdi. RF rahbari, zarur bo‘lsa, Suriyadagi harbiy qo‘shilma bir necha soat ichida kuchaytirilishi mumkinligini aytib o‘tdi.
Marosimda 17 harbiy xizmatchiga mukofotlar topshirildi, jumladan, to‘rt kishi — Markaziy harbiy okrug qo‘shinlari qo‘mondonining birinchi o‘rinbosari general-polkovnik Aleksandr Dvornikov, Bosh shtab bosh boshqarmasi zobiti polkovnik Vadim Baykulov, katta sinovchi shturman polkovnik Viktor Romanov va aviatsiya eskadrilyasi komandiri o‘rinbosari, mayor Andrey Dyachenko Rossiya Qahramoni unvoniga munosib ko‘rildi.
Rasmiy ma’lumotlarga ko‘ra, AQSh Suriya va Iroqdagi aviazarbalarga har kuni 11,5 million dollar sarflaydi. Rossiyaning Suriyadagi 167 kunlik (2015-yil 30-sentabridan 2016-yil 15-martigacha) operatsiyasining bir kunlik xarajati 2,8 million dollarni tashkil qildi.
Izoh (0)