O‘zbekiston U-17 termasi Yaponiyadagi xalqaro o‘rtoqlik futbol turnirida ishtirok etyapti

Tashkil etilganiga ko‘p bo‘lmagan O‘zbekiston U-17 terma jamoasi Yaponiyadagi xalqaro o‘rtoqlik turnirida ishtirok etmoqda, deb xabar beradi O‘zbekiston futbol federatsiyasi matbuot xizmati.

Ahmadjon Musayev bosh murabbiy etib tayinlangan, 1999-yilda tavallud topgan futbolchilardan iborat terma jamoa SANIX xalqaro kubogi turniridagi ishtirokini bugun, 17-mart kuni boshladi. Turnirda, shuningdek, Yaponiya U-17, Janubiy Koreya U-17 hamda Pekin U-17 terma jamoalari ishtirok etmoqda.

O‘zbekiston U-17 dastlabki uchrashuvni Yaponiyaga qarshi o‘tkazdi. Uchrashuv asosiy vaqti 0:0 hisobidagi durang natija bilan yakunlandi. Musobaqa reglamentiga ko‘ra, durang bilan yakunlangan o‘yinning asosiy vaqtidan so‘ng penaltilar seriyasi o‘tkaziladi. Penaltilar seriyasida yaponiyaliklar aniqroq harakat qilib, g‘alabani qo‘lga kiritdi — 5:3.

Ushbu musobaqa reglamentiga ko‘ra, o‘yinning asosiy vaqtida g‘alaba qozongan jamoaga 4 ochko, mag‘lub bo‘lgan jamoaga 0 ochko beriladi. Shuningdek, penaltilar seriyasi bo‘yicha g‘alaba qozongan jamoaga 2,5 ochko, penaltilar seriyasi bo‘yicha mag‘lub bo‘lgan jamoaga esa 1,5 ochko taqdim etiladi.

Ma’lumot o‘rnida, tashkil etilganiga bir hafta bo‘lgan O‘zbekiston U-17 terma jamoasi 2017-yil bo‘lib o‘tadigan yoshlar o‘rtasidagi Osiyo chempionatining saralash turnirida ishtirok etadi. Ya’ni, ayni paytda 17 yoshni qarshi olgan futbolchilar, bir yildan keyin O‘zbekiston U-18 termasiga aylanadi. Bu jamoa 2018-yil 19 yoshgacha bo‘lgan futbolchilar o‘rtasidagi Osiyo chempionati U-19 musobaqasida ishtirok etishi ko‘zda tutilgan.

SANIX xalqaro kubogi turniri

Yaponiya U-17 – O‘zbekiston U-17 — 0:0 (penaltilar seriyasi – 5:3)

Zaxira: 1. Akrom Xo‘jayev, 4. Otabek Bekboyev, 9. Kamron Saidazimov, 10. Zokirjon Ahmadjonov, 13. Abdullo Rahimjonov, 14. Jasur Rahimov, 17. Afzaljon Xolmuhamedov, 18. Doniyor Azizov, 21. Javohir Qilichev.