Braziliya sobiq prezidentining ma’muriyat rahbari etib tayinlanishi noroziliklarni yuzaga keltirdi

Braziliyada namoyishchilar mamlakatning sobiq rahbari Luis Inasiu Lula da Silvaning prezident ma’muriyati rahbari lavozimiga tayinlanishiga qarshi chiqdi. Bu haqda Reuters agentligi ma’lumotiga tayanib, “RBK” xabar beradi.

Ushbu qarorga qarshi namoyishlar bir nechta yirik shaharlarda bo‘lib o‘tdi.

Mamlakat poytaxti Braziliada ko‘chalarga besh mingdan ortiq namoyishchi chiqdi. Ular prezident qarorgohi va kongress binosi yaqinidagi ko‘chani to‘ldirib yubordi, politsiya ularga qarshi ko‘zni yoshlantiruvchi gazni qo‘lladi.

Kuni kecha Braziliya prezidenti Dilma Russeff da Silvani o‘z ma’muriyatining rahbarligi lavozimiga tayinladi. Bu o‘tgan hafta pullarni o‘zlashtirish va firibgarlikda ayblangan da Silvani jinoiy ta’qibdan qutqarishi mumkin.