Turkiyaning yana bir tumanida komendantlik soati joriy qilindi

Turkiyaning Diyorbakir viloyati hokimiyati 15-mart, seshanba kuni Bag‘lar uyezdining Qaynartepa tumanida muddatsiz komendantlik soati joriy etilganini e’lon qildi. Bu haqda “RIA Novosti” xabar bermoqda.

Bir necha kun muqaddam mamlakat ichki ishlar vaziri Efkan Ala tez orada Turkiyada man etilgan Kurdiston ishchi partiyasiga qarshi aksilterror operatsiyasi boshlanishini e’lon qilgan edi. Operatsiya o‘tkazilishi kutilayotgan Yuksekova (Xakkari viloyati), Shirnak (Shirnak viloyati) va Nusaybin (Mardin viloyati) tumanlarida komendantlik soati joriy etilgan edi. Bular qatoriga Qaynartepa ham qo‘shildi.

Mahalliy hokimiyatning bayonotida komendantlik soati “ayirmachi terrorchi guruh a’zolarini yo‘q qilish, barrikadalarni yig‘ishtirish va qo‘lbola portlovchi uskunalarni zararsizlantirish, shuningdek, fuqarolar xavfsizligini ta’minlash” maqsadida joriy etilgani ta’kidlandi.