Madridning “Real” jamoasi hujumchisi Krishtianu Ronaldu Ispaniya chempionati 29-turida “Las-Palmas”ga qarshi (2:1) kechgan o‘yin davomida to‘pga atigi 28 marotaba teginib, ushbu ko‘rsatkich bo‘yicha La Ligada shaxsiy antirekordini yangiladi. Bu haqda AS xabar bermoqda.
Portugaliyalik futbolchining avvalgi antirekordi 38 ta teginishni tashkil qilgan. 31 yoshli hujumchi “Eybar” va “Rayo Valyekano”ga qarshi o‘yinlarda to‘pga 38 martadan tegingan edi.
Qayd etish kerakki, Ronaldu Ispaniya chempionatining 7 o‘yinida to‘pga 28 martadan kamroq tegingan. Biroq o‘sha o‘yinlarda u maydonda 45 daqiqa va undan kamroq harakat qilgan edi.
Yevropa Chempionlar Ligasi doirasida Ronalduning to‘pga teginish bo‘yicha antirekordi 16 tani tashkil qiladi. 2013/14-yilgi mavsumda “Real” YeChL yarim final dastlabki o‘yinida “Bavariya”ga qarshi (1:0) bahs olib borgan edi. Ronaldu 73-daqiqada zaxiradan maydonga tushib, to‘pga 16 marotaba tegingan.
Izoh (0)