Ja’far Irismetov boshqaruvi ostidagi “Toshkent shahri imomlari” jamoasi O‘zbekiston musulmonlari idorasi tizimidagi futbol musobaqasining finaliga chiqdi

O‘zbekiston musulmonlari idorasi tizimidagi futbol jamoalari o‘rtasidagi musobaqaning yarim final uchrashuvlari bo‘lib o‘tdi, deb xabar beradi O‘zbekiston musulmonlari idorasi matbuot xizmati.

Guruh bahslaridan muvaffaqiyatli o‘tib, yarim finalga yo‘l olgan “Toshkent viloyati imomlari”, “O‘zbekiston musulmonlari idorasi”, “Movarounnahr nashriyoti” hamda “Toshkent shahri imomlari” jamoalari final yo‘llanmasi uchun o‘zaro bahs olib bordi.

Dastlabki yarim final uchrashuvida “Toshkent viloyati imomlari” jamoasi “O‘zbekiston musulmonlari idorasi” ustidan 4:3 hisobida g‘alaba qozondi.

Ikkinchi yarim final bahsida “Movarounnahr nashriyoti” hamda “Toshkent shahri imomlari” jamoalari o‘zaro to‘qnash keldi. Yaqin o‘tmishning taniqli futbolchisi, futbol bo‘yicha O‘zbekiston milliy chempionatining bir mavsumida eng ko‘p gol kiritish bo‘yicha rekordchisi Ja’far Irismetov murabbiyligi ostida maydonga tushgan “Toshkent shahri imomlari” jamoasi raqiblariga hech qanday imkoniyat qoldirmagan holda 7:2 hisobida zafar quchdi va musobaqa finaliga yo‘l oldi.

18-mart, juma kuni musobaqaning final bellashuvida “Toshkent shahri imomlari” va “Toshkent viloyati imomlari” jamoalari g‘oliblik uchun maydonga chiqadi.