Putin Rossiya qo‘shinlarini Suriyadan olib chiqishni boshlashga buyruq berdi

Rossiya Federatsiyasi prezidenti Vladimir Putin Rossiya qo‘shinlarini Suriyadan olib chiqishni boshlashga buyruq berdi, deb xabar beradi Meduza.

Davlat rahbarining so‘zlariga ko‘ra, u armiya oldiga qo‘ygan vazifa “umumiy olib qaraganda bajarilgan”. Putin mudofaa vaziri Sergey Shoygu va TIV rahbari Sergey Lavrov bilan uchrashuv chog‘ida shunday fikr bildirdi.

Putin qo‘shinlarni olib chiqish siyosiy muzokaralarga stimul bo‘lib xizmat qiladi, deb hisoblamoqda.

Rossiya Suriyadagi harbiy operatsiyalarda 2015-yilning 30-sentabridan beri ishtirok etib kelmoqda. Rus samolyotlari Suriya hukumat qo‘shinlari ko‘rsatgan marralarni bombardimon qildi. Bundan tashqari, Rossiya suvosti kemalari va kemalardan zarbalar berdi.

Shoyguning so‘zlariga ko‘ra, operatsiyalar davomida rossiyalik harbiylar 2000 ga yaqin terrorchini yo‘q qilgan. Syrian Observatory for Human Rights kuzatuvchilarining ma’lumotiga ko‘ra, Rossiyaning bombardimonlari natijasida 1700 nafar tinch aholi vakili nobud bo‘lgan.