Rossiyada bo‘lib o‘tadigan futbol bo‘yicha 2018-yilgi Jahon chempionatiga Osiyo qit’asi jamoalari saralashining uchinchi bosqichi uchun qur’a tashlash marosimi muddati ma’lum bo‘ldi, deb xabar bermoqda O‘zbekiston futbol federatsiyasi matbuot xizmati.
Qur’a marosimi 2016-yilning 12-aprel kuni, Malayziya poytaxti Kuala-Lumpur shahrida bo‘lib o‘tadi.
Unda ikkinchi saralash bosqichidan o‘tgan 12 terma jamoa oltitadan ikki guruhga ajratiladi. Guruhlarda birinchi va ikkinchi o‘rinni qo‘lga kiritgan to‘rt jamoa Jahon chempionati yo‘llanmasini qo‘lga kiritadi. Uchinchi o‘rin sohiblari esa o‘zaro o‘yin o‘tkazib, g‘olib jamoa FIFA qaroriga ko‘ra boshqa konfederatsiya vakiliga qarshi saralashning so‘nggi uchrashuvini o‘tkazadi.
Eslatib o‘tamiz, O‘zbekiston milliy terma jamoasining Jahon chempionatiga ikkinchi saralash bosqichi so‘nggi ikki o‘yini Toshkentdagi “Bunyodkor” stadionida bo‘lib o‘tadi. 24-mart kuni Filippinga qarshi hamda 29-mart kuni Bahraynga qarshi bo‘ladigan o‘yinlari 18:00 da start oladi.
Ma’lumot uchun, so‘nggi ikki o‘yin oldidan O‘zbekiston terma jamoasi “H” guruhida olti uchrashuv o‘tkazib, 15 ochko to‘plagan holda ikkinchi o‘rinni egallab turibdi. Yetti uchrashuvda 16 ochko jamg‘argan KXDR termasi guruhda peshqadamlik qilmoqda.
Izoh (0)