“Chelsi” jamoasi hujumchisi Diyego Kosta “Everton”ga qarshi (0:2) Angliya Kubogi chorak final o‘yinida raqib yarim himoyachisi Garet Barrini tishlab oldi, deb xabar beradi “iSport.ua”.
Uchrashuvning 84-daqiqasida “Everton” yarim himoyachisi Garet Barri “Chelsi” hujumchisi Diyego Kostaga nisbatan qo‘pol o‘ynab, uni yiqitdi. Asablarini jilovlay olmagan jabrlanuvchi (Diyego Kosta) o‘rnidan turib, raqibi tomon yuzlandi va unga tahdid qila boshladi. Ushbu vaziyatda Kosta Barrini bilinar-bilinmas bo‘ynidan tishlab oldi.
Uchrashuvni boshqarib borgan hakam Maykl Oliver har ikki futbolchini sariq kartochka bilan jazoladi. Kosta uchun bu o‘yindagi ikkinchi sariq kartochka bo‘lgani uchun u maydonni tark etishga majbur bo‘ldi. 3 daqiqa o‘tar-o‘tmas Garet Barri yana o‘yin qoidasini buzdi va hakam tomonidan ikkinchi ogohlantirish oldi. Natijada u ham maydonni tark etdi.
Qayd etish joiz, mazkur uchrashuvda “Everton” jamoasi Romelu Lukakuning dubli evaziga “Chelsi”ni mag‘lubiyatga uchratib, Angliya Kubogining yarim finaliga chiqdi.
Izoh (0)