Minskda Lukashenkoga yaqin ishbilarmon qo‘lga olindi

Belarusda “Traypl” kompaniyalar guruhi asoschisi va rahbari Yuriy Chij qo‘lga olindi. Bu haqda “Tut.by” portaliga asoslanib, “RBK” xabar bermoqda.

Dastavval Chijning qo‘lga olinishi haqida portal foydalanuvchilari xabar qildi. Aytilishicha, “Traypl”ning Minskdagi ofisi yaqinida mikroavtobuslar bo‘lib, ularning yaqinida qora kiyingan odamlar turgan. So‘ng niqobli guruh ofisga kirgan.

“Tribuna.com” nashrining ma’lum qilishicha, “Traypl” qatorida, Chijga tegishli “Dinamo” futbol jamoasi ofisida ham tintuv o‘tkazilgan.

Chij ilgari Belarus prezidenti Aleksandr Lukashenkoning davrasiga yaqin ishbilarmon hisoblanardi, ammo “Traypl” bo‘yicha sherigi Vladimir Yaprinsevning qo‘lga olinishidan so‘ng unda ham muammolar boshlandi. Voqea ishtirokchilariga yaqin manbalardan birining ma’lum qilishicha, tintuv va boshqa xatti-harakatlar davlat rahbarining ruxsatisiz amalga oshirilmagan.

Shu bilan birga, Chijning mavqei hozircha juda yuqoriligi va yaqin orada vaziyat yaxshilanishi aytilmoqda.