San-Paulu prokuraturasi mol-mulkni yashirish va noto‘g‘ri ma’lumot berishda gumon qilib, 9-mart, chorshanba kuni Braziliyaning sobiq prezidenti Luis Inasiu Lula da Silvaga nisbatan ayblov e’lon qildi. Bu haqda “TASS” xabar bermoqda.
Ayblovlar sobiq davlat rahbarining rafiqasi Mariya Letisiya va katta o‘g‘li Fabiu Luisga nisbatan ham ilgari surildi. Gap San-Paulu shtatining Guaruja kurort shahrida joylashgan hashamatli kvartira haqida ketmoqda. Tergovchilar Lula da Silva va uning oilasi ushbu ko‘chmas mulkka egalik qilishi, biroq buni deklaratsiyada ko‘rsatib o‘tmaganini ta’kidlamoqda.
Shuningdek, prokuratura kvartira sobiq prezident aloqadorligi istisno etilmagan mablag‘lardan noqonuniy foydalanish jarayoniga taalluqli bo‘lishi mumkinligini gumon qilmoqda. Da Silva esa kvartira bilan avval chindan ham qiziqqani, biroq yakunda uni xarid qilishdan voz kechganini bildirgandi.
Eslatib o‘tamiz, oldinroq Braziliyaning sobiq prezidenti uyida Petrobras neft kompaniyasi ishi doirasida tintuv o‘tkazilgani va uning o‘zi politsiyada so‘roq qilingani haqida xabar berilgandi.
Izoh (0)