Tunis xavfsizlik kuchlari Liviya bilan chegaradagi Ben-Gerdan shahridagi kazarmalarga hujum qilishga aloqador deb gumon qilinayotgan 16 kishini hibsga oldi. Bu haqda, mamlakat milliy mudofaa vazirligi matbuot kotibi, podpolkovnik Belhasen Veslatiyning so‘zlariga asoslanib, “TASS” xabar bermoqda.
“Ben-Gerdan shahri atrofidagi aksilterror operatsiyasi chog‘ida Tunis xavfsizlik kuchlari bo‘linmalari tomonidan Milliy gvardiya kazarmalariga hujumni tashkil qilish va uyushtirishda aloqadorlikda gumondor 16 shaxs qo‘lga olindi. Hibsga olinganlarga nisbatan tezkor tergov harakatlari boshlab yuborildi”, — ma’lum qildi vazirlik vakili.
Kecha, 8-mart kuni Ben-Gerdan shahrida o‘tkazilgan maxsus operatsiya natijasida kamida 35 nafar terrorchi yo‘q qilingani, yana yetti nafar jangari qo‘lga olingani haqida axborot berilgan edi. Keyinchalik halok bo‘lgan jangarilar soni 37 nafarga, qo‘lga olinganlari soni esa sakkiz nafarga yetdi.
Operatsiya 7-mart kuni Tunis—Liviya chegarasini buzib kirib, Milliy gvardiya chegara postlariga hujum qilgan IShID jangarilari guruhiga qarshi o‘tkazildi. Ekstremistlar hujumi oqibatida tinch aholining yetti vakili va 12 harbiy halok bo‘ldi, 17 kishi jarohatlandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)