Toshkentda O‘zbekistonning milliy mahsulotlardan yasalgan eng katta xaritasi taqdim etildi (foto)

6-mart kuni Toshkentdagi “Samarqand Darvoza” savdo-ko‘ngilochar markazida oshpaz va restorator Bahriddin Chustiy milliy oziq-ovqat mahsulotlaridan foydalangan holda O‘zbekistonning eng katta xaritasini yaratdi. Bu haqda “Pisma o Tashkente” xabar qildi.

Oziq-ovqatlardan qilingan mahsulot Interrecord agentligi tomonidan “milliy mahsulotlardan qilingan eng katta O‘zbekiston xaritasi” deya ro‘yxatga olindi. Xarita uzunligi 6 metr, kengligi 3 metr bo‘lib, uni tayyorlashda 20 dan ziyod milliy mahsulotlardan foydalanildi.

Har bir viloyatni, shuningdek, chegaralar va daryolarni aks ettirish uchun muayyan mahsulot ishlatildi, jumladan:

1. Andijon — devzira, 1,2 kg;
2. Namangan — sariq mayiz, 1,1 kg;
3. Farg‘ona — Qo‘qon holvasi, 1,8 kg;
4. Toshkent — mosh, 1 kg va qazi, 1,5 kg;
5. Sirdaryo — qovurilgan no‘xat, 900 gr;
6. Jizzax — somsa, 148 dona;
7. Samarqand — qora mayiz, 2 kg;
8. Navoiy — novvot, 22 kg;
9. Buxoro — sho‘rdanak, 5 kg;
10. Surxondaryo — xandon pista, 1,7 kg;
11. Qashqadaryo — o‘rik qoqi, 5 kg;
12. Xorazm — lojuvard (lazer) guruch, 8954 dona — bu O‘zbekiston mustaqillikka erishganidan bugungacha bo‘lgan kunlar soni;
13. Qoraqalpog‘iston — 727 qovurilgan chuchvara va talqon;
14. Daryo va dengizlar — ko‘k parvarda, 1, 2 kg;
15. Respublika chegarasi — qizil parvarda, 3,1 kg;
16. Viloyatlar chegarasi — sariq parvarda, 2 kg;
17. Tarixiy obidalar — chak-chak, 13 pachka;
18. Buyuk Ipak Yo‘li — talqon;
19. Karvonlar — shokolad va mastika;
20. Sumalak uchun undirilgan bug‘doy, 8 kg.