Rossiyalik konkida yuguruvchi sportchi Pavel Kulijnikov taqiqlangan meldoniy preparatini iste’mol qilgani ma’lum bo‘ldi

Konkida yugurish sporti bo‘yicha besh karra Jahon chempioni, rossiyalik Pavel Kulijnikovdan olingan namunalarda taqiqlangan preparat — meldoniy topilganini ma’lum bo‘ldi. Bu haqda “R-Sport” nashriga tayanib, “Chempionat” xabar bermoqda.

Kulijnikov joriy yilning 11–13-mart kunlari Gollandiyaning Xerenven shahrida konkida yugurish sporti bo‘yicha Jahon kubogi final bosqichida ishtirok etmaydigan bo‘ldi.

Bundan avval rossiyalik sportchining organizmida taqiqlangan metilgeksanamin moddasi aniqlangan va u 2012–2014-yillar davomida barcha turnirlardan chetlashtirilgandi. Antidoping qoidalarining takroriy buzilishi umrbod diskvalifikatsiyaga olib kelishi mumkin.

Eslatib o‘tamiz, kecha, 7-mart kuni rossiyalik tennischi Mariya Sharapova Los-Anjelesdagi maxsus matbuot anjumani chog‘ida 2016-yilgi Avstraliya ochiq chempionatida undan olingan namunalarda man etilgan preparat — meldoniy topilganini tan oldi.