O‘zbekiston milliy terma jamoasi bosh murabbiyi Samvel Babayan OAV vakillari o‘rtasida o‘tkazilgan so‘rov natijalariga ko‘ra, O‘zbekistonning 2015-yildagi eng yaxshi murabbiyi deb topildi. Bu haqda O‘zbekiston futbol federatsiyasi matbuot xizmati xabar bermoqda.
O‘tgan yilning iyun oyidan buyon O‘zbekiston milliy terma jamoasiga bosh murabbiylik qilayotgan Samvel Babayan mazkur so‘rovnomada, o‘z tarixida ilk bor O‘zbekiston Kubogini qo‘lga kiritgan Qarshining “Nasaf” klubi ustozi Ro‘ziqul Berdiyev hamda O‘zbekiston U-20 yoshlar terma jamoasini Jahon chempionatida chorak finalga qadar olib chiqqan Ravshan Haydarovni ortda qoldirdi.
Ta’kidlash joiz, Samvel Babayan murabbiyligida O‘zbekiston milliy terma jamoasi JCh—2018 hamda OK—2019 saralashi doirasida jami 4 ta uchrashuvda maydonga tushdi va ularning barchasida g‘alaba qozondi.
Ma’lumot uchun, Samvel Babayan 2014-yil yakunlariga ko‘ra ham O‘zbekistonda yilning eng yaxshi murabbiyi deya e’tirof etilgan edi va mazkur sovrin murabbiy uchun faoliyatidagi ketma-ket ikkinchisi bo‘ldi.
Yilning eng yaxshi murabbiyi so‘rovida kuchli uchlik quyidagicha ko‘rinish oldi:
- Samvel Babayan (O‘zbekiston milliy terma jamoasi) – 60 ochko
- Ro‘ziqul Berdiyev (“Nasaf”, O‘zbekiston) – 44 ochko
- Ravshan Haydarov (O‘zbekiston U-20 terma jamoasi) – 10 ochko
Izoh (0)