2016-yilning 1-martidan boshlab O‘zbekiston hududida yangi tahrirdagi Yo‘l harakat qoidalari kuchga kiradi. Shu munosabat bilan “Carzone.uz” nashri haydovchilar, yo‘lovchilar va piyodalarga nisbatan amalga qiladigan eng muhim yangi tartib va qoidalarni yodga olib o‘tdi.
1-martdan boshlab haydovchilar:
- harakatni boshlashdan oldin yo‘lovchilarni harakat vaqtida tanani avtomobil salonidan tashqariga chiqarish mumkin emasligi haqida ogohlantirishi (qo‘lni chiqarish bunga kirmaydi);
- yo‘lovchilarga xavfsizlik kamarini taqib olish shartligini aytishi;
- ko‘p qavatli uylar orasida avtomobil tezligini 30 km/soatdan oshirmasligi;
- o‘zi bilan birga nur qaytaruvchi nimcha olib yurishi;
- tashkiliy ravishda odam olib ketayotgan, yo‘lovchilarni tashiyotgan avtobuslar, mikroavtobuslar, shuningdek, mototsikl va mopedlarda kunning yorug‘ paytida harakatlanayotganda ham yaqinni yorituvchi chiroqlarini yoqib yurishi;
- dvigatel ish hajmi 50 kub santimetrdan katta, tezligi 50 km/soatdan ortiq bo‘lgan kvadrotsikl, skuter va elektroskuter kabilarni davlat raqami va haydovchilik guvohnomasisiz boshqarmasligi;
- “A” toifadagi transport vositalarini boshqarish huquqini beruvchi haydovchilik guvohnomasini olishga o‘qiyotganlarning yoshi o‘qishni bitirish vaqtida 16 yosh, “B” va “C” toifadagi haydovchilik guvohnomasini olishga o‘qiyotganlarning yoshi o‘qishni bitirish vaqtida 18 yosh, “D” va tramvay, trolleybusni boshqarish huquqini beruvchi haydovchilik guvohnomasini olishga o‘qiyotganlarning yoshi o‘qishni bitirish vaqtida 21 yosh bo‘lishi shart.
Bundan tashqari, Toshkent shahrida yo‘l harakati xavfsizligi kompyuterlashtirilgan boshqaruv tizimi orqali ta’minlanadi. Toshkent yo‘llarida avtomobilni boshqarish vaqtidagi qoidabuzarlik foto va videofiksatsiya tizimi orqali qayd etilsa, mazkur holat yuzasidan transport vositasi egasi tegishli tartibda jarimaga tortiladi.
Izoh (0)