Bir necha kun muqaddam Misr sudi Ahmad Mansur Qur’oniy Alini sud qilib, uni ommaviy tartibsizliklarda ishtirok etishda va qotillikda aybdor deb topgani jahon matbuotida shov-shuv keltirib chiqargandi. Gap shundaki, Mansur Qur’oniy 4 yoshli boladir, “jinoyatlar” sodir etilganida, u 2 yoshga ham to‘lmagan edi. Sud uni shu ism-sharifga ega o‘smir bilan adashtirib yuborganini tan oldi.
Mansur Qur’oniy voqeasi haqida CNN telekanaliga tayangan holda Meduza batafsil ma’lumot keltirdi.
To‘rt yoshli Mansur 16-fevral kuni harbiy sud tomonidan Al-Fayyum shahrida 2014-yilning yanvarida sodir bo‘lgan ommaviy tartibsizliklarda ishtirok etgani tufayli umrbod ozodlikdan mahrum etish jazosiga hukm qilingan 116 sudlanuvchidan biridir. Sud qaroriga muvofiq, mamlakatning ilgarigi prezidenti Muhammad Mursiyning tarafdorlari uch kishini o‘ldirgan (boshqa ma’lumotlarga ko‘ra, to‘rt kishini o‘ldirgan, sakkiz kishini yarador qilgan), shuningdek, davlat mulkiga zarar yetkazgan.
O‘sha paytda Mansur bir yoshdan endigina oshgan edi. Birinchi marta uni tartibsizlikdan bir necha kun o‘tib hibsga olishga urinishdi. Otasi politsiyachilarga bir yashar bolani ko‘rsatganidan so‘ng huquq-tartibot xodimlari uning o‘zini hibsga oldi.
Bolaning otasi to‘rt oy hibsda o‘tirib, so‘ng sud oldida javob berdi. Sudya, barcha hujjatlarni o‘rganib chiqib, xatolik yuz berganini tushundi va erkakni qo‘yib yubordi. Shundan keyin, katta Mansur Qur’oniy yana qamalishdan xavfsirab, bir yarim yil davomida yashirinib yurdi.
Ammo 2016-yilning fevralida harbiy sud otaga emas, farzandga nisbatan hukm o‘qidi. Advokatlar xatolikni isbotlash maqsadida bolaning tug‘ilganlik haqidagi guvohnomasini ko‘rsatdi. Bundan tashqari, huquqshunos Abu Kafning so‘zlariga qaraganda, sudlanganlar ro‘yxatida tartibsizliklar kuni mamlakatda bo‘lmagan kishining ham ismi-sharifi bor. Bu surishtiruv ishlarining shosha-pisha olib borilganidan dalolatdir, deb hisoblaydi mutaxassis.
Gap shundaki, tartibsizliklarda ayblangan 116 kishining ismlari voqea yuz berganidan bir kun o‘tib e’lon qilingan. Ro‘yxatga kirgan o‘smirlardan birining ismi-sharifi 4 yoshli Mansur Qur’oniynikiga aynan to‘g‘ri kelib qolgan.
OAV ushbu voqeaga e’tibor berganidan so‘ng sud bolakayga o‘qilgan hukmni o‘zgartirdi. Uchinchi hokimiyat xatosini tan olib, bola ham, uning otasi ham ta’qib qilinmasligini va hibsga olinmasligini aytdi. Aslida huquq-tartibot organlariga 16 yoshli Ahmad Mansur Sharora kerakligi aniqlandi.
Bir muddat o‘tib, 4 yoshli bola otasi bilan DreamTV xususiy telekanali efirida chiqdi. Otasi bo‘lib o‘tgan voqealarni hikoya qilarkan, bola uning qo‘lida uxlardi. Oila advokati Id Said Ahmad Mansur ismli gumondorning yashash joyi noto‘g‘ri ko‘rsatilgani yanglishlikni keltirib chiqarganini ta’kidlab o‘tdi.
Shou chog‘ida Misr ichki ishlar vazirligi matbuot kotibi Abubakr Abdulkarim qo‘ng‘iroq qilib, keltirilgan ma’lumotlarni tasdiqladi va nohaq ayblangan oilaga endi hech narsa tahdid qilmasligini yana bir bora ta’kidlab o‘tdi. Shu bilan birga, Abdulkarim qidirilayotganlar orasida Ahmadning tog‘asi ham borligini eslatib o‘tdi.
Shouga, shuningdek, bolaning onasi qo‘ng‘iroq qildi. U yaqindagina uyga politsiya xodimlari kelib ketganini, bolaning qayerda ekanligiga qiziqish bildirilganini aytdi. Ahmad Mansurning tog‘asi haqida politsiyachilar hech narsa so‘ramagan. Buni eshitib, oila boshlig‘i yig‘lay boshladi.
“Men yomon narsa qilmadim. Ular bolamni olib qo‘yishlarini aytdi. Lekin uni hech kim olib keta olmaydi. Xudoyim, meni yolg‘iz qoldirma”, – dedi erkak.
Izoh (0)