Facebook va Twitter terrorchi telefoni himoyasini buzishni rad etgan Apple’ni qo‘llab-quvvatladi

Facebook kompaniyasi FQBga San-Bernardinodagi qurolli hujumda ishtirok etgan terrorchilardan birining iPhone smartfoni himoyasini buzishga yordam berishni rad qilgan Apple korporatsiyasini qo‘llab-quvvatladi. Bu haqda “TASS” xabar beradi.

“Biz yuqori texnologiyali kompaniyalarga nisbatan ular tizimining himoyasini kuchsizlantirish haqida bildirilayotgan talablarga qarshi kurashishni davom ettiramiz. Bu kabi talablar kompaniyalarga o‘z mahsulotlarining xavfsizligini ta’minlashdagi harakatlariga xalaqit beradi”, — deb ta’kidlandi ijtimoiy tarmoqda.

Mikrobloglar servisiga ega bo‘lgan Twitter kompaniyasi ham Apple’ning qarorini qo‘llab-quvvatladi. Uning rahbari Jek Dorsi Twitter’dagi sahifasida “Biz Apple’ni qo‘llab-quvvatlaymiz va Tim Kukka yetakchiligi uchun minnatdorlik bildiramiz”, deb qayd etdi.

Eslatib o‘tamiz, bundan avval Google va WhatsApp kompaniyalari ham Apple’ni qo‘llab-quvvatlashini ma’lum qilgan edi.