Apple korporatsiyasi rahbari Tim Kuk Kaliforniya shtatining San-Bernardino shahrida terakt uyushtirgan jinoyatchining telefon himoyasini buzishda yordam berish borasidagi sud qaroriga rasmiy e’tiroz bildirilishini ta’kidlab o‘tdi. Bu haqda kompaniya saytida joylashtirilgan bayonotga tayangan holda “TASS” agentligi xabar bermoqda.
Ilgari xabar qilinganidek, seshanba, 16-fevral kuni sudya Sheri Pim AQShning Apple korporatsiyasi Federal qidiruv byurosi xodimlariga “San-Bernardino mergani”ning telefonini buzib, undagi ma’lumotlarni olishda yordam berishi lozimligi haqida qaror qabul qildi.
Sud qaroriga muvofiq, korporatsiya shu paytga qadar terrorchilardan biri Said Faruqning mobil uskunasi ma’lumotlariga buzib kira olmayotgan FQB xodimlariga maxsus dasturiy ta’minot taqdim etishi talab qilinadi.
“Qo‘shma Shtatlar hukumati Apple’dan mijozlarimiz xavfsizligini shubha ostiga qo‘yadigan mislsiz qadam tashlashni talab qildi, – deyiladi Kukning bayonotida. – Biz bu ko‘rsatmaga qarshi chiqamiz, zero uning oqibatlari ko‘rilayotgan yuridik ish doirasidan tashqariga chiqib ketadi”.
Tim Kuk korporatsiyaning barcha vakillari Kaliforniyada sodir etilgan jinoyatdan dahshatda ekanligini, shuningdek, FQBga tergovda kerak bo‘ladigan barcha ma’lumotlar allaqachon taqdim etib bo‘linganini aytib o‘tdi. Shu bilan birga, iPhone himoyasini buza oladigan dasturiy ta’minot maxsus organlarga taqdim etilmasligi yana bir bora ta’kidlandi.
“Hukumat Apple’dan o‘z foydalanuvchilarini xakerlik hujumiga duchor qilib, o‘nlab yillar davomida xavfsizlik sohasida erishilgan yutuqlarni yo‘qqa chiqarishni talab qilmoqda, lekin bu yutuqlar mijozlarimizni, shu jumladan, o‘n millionlab amerikaliklarni xakerlar va kiberjinoyatchilardan himoya qilish yo‘lida xizmat qilmoqda”, – deyiladi bayonot matnida.
Eslatib o‘tamiz, 2015-yilning 2-dekabr kuni AQSh fuqarosi Said Faruq turmush o‘rtog‘i Teshfin Malik bilan San-Bernardinodagi nogironlarga yordam ko‘rsatish markaziga uyushtirgan hujumi oqibatida 14 kishi halok bo‘lgan, 21 kishi jarohat olgan edi. Politsiya tomonidan yo‘q qilingan terrorchilar IShIDga dahldorligi aytilgan edi.
Izoh (0)