Xonanda Lola 14-fevral — Zahiriddin Muhammad Bobur tavallud topgan sana munosabati bilan Toshkent ko‘chalarida o‘ziga xos aksiya o‘tkazdi va jarayonni Facebook sahifasiga fotosuratlar ko‘rinishida joyladi.
“Ertaga (suratlar 13-fevralda joylangan) qanday kun? #BoburDay Valentin kuni? Yo‘q, unaqasini eshitmaganman”, — deya yozgan u.
Suratlarda xonanda avtobus ichidagi yo‘lovchilar orasida, bir guruh bolalar orasida #BoburDay heshtegi tushirilgan plakat bilan turganini ko‘rish mumkin. Rasmlardan birida, hatto, avtobus haydovchisi ham heshtegni tutib turibdi.
Postga fikr bildirganlarning ko‘pchiligi ushbu aksiyani qo‘llab-quvvatlab, Lolaning qo‘shayotgan hissasini yuqori baholagan. Biroq uning xatti-harakatlaridan kinoya yoki “litsenziyasini qaytarish uchun urinish” alomatlarini qidirganlar ham bo‘ldi.
Eslatib o‘tamiz, O‘zbekiston oliy ta’lim muassasalari talabalaridan tashkil topgan Yoshlar klubi tomonidan 14-fevral, yakshanba kuni soat 14:00 dan boshlab navbatdagi virtual aksiyaga start beriladi.
Shu kuni Twitter mikrobloglar xizmatining o‘zbekistonlik faol foydalanuvchilari mutafakkir va davlat arbobi Zahiriddin Muhammad Bobur tavalludining 533 yilligiga bag‘ishlangan #BoburDay heshtegini jahon trendiga olib chiqish uchun harakat boshlaydi.
Ularga o‘zbek estradasi, kino san’atining yorqin vakillari ham yaqindan yordam beradi.
Aksiyada barcha ijtimoiy tarmoqlarning faollari #BoburDay yozuvi (heshtegi)ni ishlatgan holda post qoldirib, ishtirok etishi mumkin.
Izoh (0)