2-fevralda favqulodda yerga qo‘nishga majbur bo‘lgan Daallo Airlines A321 rusumli samolyotining bortiga harbiy tusdagi portlovchi moslama noutbukda olib kirilgan. Bu haqda CNN telekompaniyasi bergan ma’lumotlarga asosan “Korrespondent.net” xabar qilmoqda.
Tergov jarayoni bilan tanishish huquqiga ega bo‘lgan vakillarning ma’lum qilishicha, portlatishni sodir qilgan shaxs somalilik Abdullahiy Abdisalam Borlex ekanligi aniqlangan.
Taxmin qilinishicha, Borlex ichida portlovchi moslama joylashtirilgan noutbukni samolyotga olib kirgan.
Jinoyatchi salondagi o‘rindiq joyini tanlashda samolyotga imkon darajada jiddiy ziyon yetkazishni maqsad qilgan. Qo‘lbola portlovchi moslama yoqilg‘i baklarini portlatib yuborishga moslashtirilib o‘rnatilgan.
Rasmiylar teraktni “Ash-Shabob” islomiy guruhi tashkillashtirgan deb hisoblasa-da, Borlexning mazkur guruhga aloqadorligi hozircha aniqlanmagan.
Eslatib o‘tamiz, ekspertlar korpusdagi yoriq tufayli Somaliga shoshilinch ravishda qo‘ngan A321 samolyoti bortidagi portlash terakt natijasida kelib chiqqan deb baholagan edi.
Izoh (0)