“Toshkent” vokzalidan “TTZ” bozoriga qadar qatnovchi 14-yo‘nalishdagi avtobuslar Wi-Fi bilan ta’minlandi. Bu haqda Facebook’dagi “Potrebitel.uz” guruhi foydalanuvchisi fotoxabar qoldirgan.
“Bugun avtobusdagi bepul va yaxshi tezlikdagi Wi-Fi internetdan foydalandim. Oldinga tashlangan katta qadam!”, — deb yozadi foydalanuvchi.
Avtobus chiptachisining Facebook’da xabar qoldirgan yo‘lovchiga ma’lum qilishicha, hozircha Wi-Fi faqat 14-yo‘nalishdagi avtobuslarda bor.
Foydalanuvchi avtobus ichidagi Wi-Fi haqidagi e’lon suratini ham ilova qilgan. E’londa: “Bu avtobusda Wi-Fi bor”, deb yozilgan va ulanish mumkin bo‘lgan tarmoq nomi (“WI-FI-BUS”) ko‘rsatilgan.
Foydalanuvchining qayd etishicha, avtobusda bepul Wi-Fi’dan foydalanayotgan yoshlar ko‘p bo‘lsa-da, internet tezligi pasaymagan. Guruhning boshqa a’zolari avtobuslardagi mazkur yangilikni olqishlagan.
Bir qator foydalanuvchilar boshqa shaharlarning jamoat transportlarida ham shunday yangiliklar joriy etilishiga umid bildirgan. Ba’zilar esa, hazilnamo tarzda, “bepul internet ishtiyoqmandlari dastidan endi bu avtobusga chiqib bo‘lmaydi”, deb yozgan.
Avvalroq Samarqand shahridagi 61-yo‘nalishdagi avtobuslarda yo‘lovchilarga Wi-Fi taklif qilinayotgani haqida xabar berilgan edi.
Izoh (0)