Xristian-sotsial ittifoqning (XSI) Bavariyadagi Kroyt aholi punktida bo‘lib o‘tgan tadbirida ishtirok etgan Germaniya kansleri Angela Merkel qochoqlarni qabul qilishga cheklov o‘rnatish to‘g‘risidagi da’vatlarni yana rad etdi. Bu haqda “TASS” xabar bermoqda.
“Kelgusida qochoqlar sonini sezilarli darajada kamaytirish zarurligi to‘g‘rida qarashlarimizda o‘xshashlik bor. Biroq Yevropa Itttifoqidagi barcha davlatlar bu masalada yakdil bo‘lsagina bunga erishish mumkin”, — deya ta’kidlagan Merkel.
2015-yil yakunlari bo‘yicha Germaniyaga 1,1 million muhojir kelgan. Kansler XSI talab etganidek qochoqlar soniga cheklov o‘rnatmasligini bir necha bor takrorlagandi. Uning aytishicha, sonidan qat’i nazar, bunga huquqi bo‘lganlarning barchasi boshpana olishi kerak, chunki mamlakat konstitutsiyasida shunday belgilab qo‘yilgan. Cheklov o‘rnatish uchun esa asosiy qonunni o‘zgartirish lozim bo‘ladi.
Eslatib o‘tamiz, oldinroq muhojirlar bilan bog‘liq siyosat tufayli Angela Merkelning reytingi rekord darajada tushib ketgani haqida xabar berilgandi.
Izoh (0)