Qodirovni iste’foga chiqarish talab qilingan arizani to‘qqiz mingdan ortiq kishi imzoladi

Qodirovning iste’foga chiqarilishi talab qilingan arizani to‘qqiz mingdan ortiq kishi imzoladi, deya xabar bermoqda TJournal.

Hujjatni imzolaganlar orasida huquq muhofazachilari Lyudmila Alekseyeva va Lev Ponomaryov, yozuvchilar Vladimir Voynovich, Lyudmila Ulitskaya, Marietta Chudakova, siyosatchilar Leonid Gozman va Andrey Piontkovskiy, rejissor Vladimir Mirzoyev, jurnalist Dmitriy Muratov va boshqa taniqli kishilar bor.

Qodirovni iste’foga chiqarish haqidagi ariza uning 12-yanvar kuni “tizimdan tashqaridagi muxolifat vakillariga xalq dushmanlari, xoinlar kabi munosabatda bo‘lish”, “bunday kishilarni ularning qo‘poruvchilik faoliyati uchun sud qilish”ga da’vat etib yozgan gaplari yuzasidan berildi.

“Tinch jamoatchilik-siyosiy faollikda ishtirok etganlik uchun xoinlik va qo‘poruvchilik harakatida ayblash to‘g‘ridan-to‘g‘ri tahdid xususiyatiga ega”, — deyiladi hujjatda.

Shuningdek, unda Ramzan Qodirov bungacha ham Rossiya Federatsiyasi qonunlariga butunlay e’tiborsizligini ko‘p bor namoyish etgani, u rahbarlik qilayotgan Checheniston Respublikasida har qanday tanqid ma’naviy va jismoniy zo‘ravonlik bilan jazolanishi haqida aytiladi. Qodirovning bayonoti mamlakatda fuqarolar tomonidan huquq va erkinliklar amalga oshirilishi borasida jiddiy tahdidni yuzaga keltirishi ta’kidlanadi hamda u o‘z lavozimidan zudlik bilan chetlatilishi zarurligi aytiladi.

Avvalroq Qodirov tizimdan tashqari muxolifat haqidagi bayonotida Rossiyani tark etib, u yerda turib, mamlakatning obro‘sini to‘kayotganlarni nazarda tutganiga aniqlik kiritgan edi.

Rossiya prezidenti huzuridagi Inson huquqlari bo‘yicha kengash 12-yanvar kuni muxolifatni “xalq dushmanlari” deya atagan Checheniston rahbari Ramzan Qodirovning so‘zlarini lingvistik ekspertizaga jo‘natishi xabar berilgan edi.