Leonardo Di Kaprio oltinchi marta “Oskar”ga nomzod bo‘ldi

Amerikaning Los-Anjeles shahrida “Oskar” mukofotiga nomzodlar e’lon qilindi. Bu haqda “Oskar”ning rasmiy sayti xabar bermoqda.

Nomzodlarni e’lon qilish marosimini rejissorlar Gilyermo del Toro va Eng Li, aktyor Jon Krasinski va Amerika kinoakademiyasi prezidenti Sheril Bun Ayzeks olib bordi.

Eng yaxshi aktyor mukofoti uchun Leonardo Di Kaprio (“O‘limdan qaytgan”), Brayan Krenston (“Trambo”), Mett Deymon (“Marslik”), Maykl Fassbender (“Stiv Jobs”) va Eddi Redmeyn (“Daniyalik qiz”) kurash olib boradi. Di Kaprio ilgari besh marta (4 marta “Eng yaxshi aktyor” va 1 marta “Eng yaxshi prodyuser” nominatsiyasida) “Oskar”ga nomzdor bo‘lgan. Ammo biron marta ham mukofotni qo‘lga kirita olmagan.

Keyt Blanshett (“Kerol”), Bri Larson (“Xona”), Jennifer Lourens (“Joy”), Sharlotta Rempling (“45 yosh”) va Sirsha Ronan (“Bruklin”) eng yaxshi aktrisa mukofoti uchun kurashadi.

Eng yaxshi rejissor mukofotiga Tomas Makkarti (“Diqqat markazida”), Adam Makkey (“Pasayish o‘yini”), Jorj Miller (“Telba Maks: G‘azab yo‘li”), Alexandro Gonsales Inyarritu (“O‘limdan qaytgan”) va Leonard Abraxamson (“Xona”) da’vogarlik qilmoqda.

Eng yaxshi film bo‘lishga nomzodlar qatoriga “Pasayish o‘yini”, “Ayg‘oqchi ko‘prigi”, “Telba Maks: G‘azab yo‘li”, “Marslik”, O‘limdan qaytgan”, “Xona” va “Diqqat markazida” kiritildi.

G‘oliblar nomi 28-fevral kuni ma’lum bo‘ladi.