“Toshshahartransxizmat” kompaniyasi 2016-yilda “avtobuslar harakatini kuzatish” xizmati ko‘rsatilmasligi haqidagi xabarlarni rad etdi. Bu haqda kompaniya saytida axborot berilgan.
Kompaniyaning qayd etishicha, shahar avtobuslari harakatini mobil qurilma va veb-interfeys orqali kuzatish imkonini beruvchi “VIA.uz” dasturini ishlab chiqqan VIA-TASHKENT kompaniyasi shartnoma yakuniga yetgan.
Shu munosabat bilan, “Toshtransdispetcherxizmat” unitar korxonasi Respublika tovar-xomashyo birjasiga “Yo‘lovchi transporti reyslari bajarilishi faoliyatini monitoring qilish bo‘yicha dasturiy mahsulotni taqdim etish va 2016-yil oxirigacha texnik qo‘llab-quvvatlash” xizmatlarini sotib olish bo‘yicha talabnoma joylashtirgan.
“Toshshahartransxizmat” kompaniyasining rasman ma’lum qilishicha, mazkur yo‘nalishdagi ishlar to‘xtatilmaydi, aksincha, davom ettiriladi va yanada takomillashtiriladi. “Avtobus harakatini kuzatish” xizmatini ko‘rsatuvchi kompaniya o‘zgargan taqdirda, mazkur loyiha faoliyatida qisqa muddatli texnik nosozliklar ro‘y berishi mumkin, ularni imkon qadar qisqa muddatda bartaraf etish rejalashtirilgan.
“‘Toshshahartransxizmat’ aksiyadorlik kompaniyasi vaqtinchalik noqulayliklar uchun uzr so‘raydi va foydalanuvchilarning Toshkent shahar transporti faoliyatiga bo‘lgan faol qiziqishi uchun minnatdorchilik bildiradi”, — deyiladi kompaniya axborotida.
Avvalroq, VIA-TASHKENT kompaniyasi 14-yanvardan boshlab “VIA.uz” mobil dasturi orqali shahar avtobuslarining harakati to‘g‘risidagi ma’lumotlarni uzatmasligini ma’lum qilgandi. VIA-TASHKENT rahbari “Toshshahartransxizmat” mazkur yo‘nalishda xizmat ko‘rsatuvchi korxonani o‘zgartirishga qaror qilganini aytib o‘tgandi.
Izoh (0)