Saudiya Arabistoni 3-yanvar, yakshanba kuni kechki payt Eron islom respublikasi bilan diplomatik aloqalar uzilganini e’lon qildi. Mamlakat tashqi ishlar vaziri Odil al-Jubayr bu haqda tegishli bayonot bergan, deya xabar qiladi “TASS”.
“Saudiya Arabistoni Eron bilan diplomatik aloqalarni uzadi va Eron diplomatik missiyasining barcha xodimlari 48 soat davomida mamlakatni tark etishini talab qiladi. Biz Eronga xavfsizligimiz va barqarorligimizga tahdid qilish, mamlakatimiz yoki ittifoqdosh davlatlar hududida terrorchilik o‘choqlarini tashkil etishiga yo‘l qo‘ymaymiz. Diplomatik aloqalarning uzilishi biz uchun maqbul ekanligi to‘g‘risidagi qarorga keldik, chunki Eron terrorizm tarqalishiga omil bo‘lishda davom etmoqda. Biz huquqlarimiz kafolatlanishi uchun barcha kerakli choralarni ko‘ramiz”, — deyiladi mazkur bayonotda.
Eslatib o‘tamiz, oldinroq Eron parlamenti — majlis nufuzli shia ulamosi Nimr an-Nimr qatl etilgani tufayli mamlakat tashqi ishlar vazirligini Saudiya Arabistoni bilan diplomatik munosabatlar darajasini pasaytirishga chaqirgani to‘g‘risida xabar berilgandi.
Izoh (0)