Texasning Enterprise Products Partners energetika kompaniyasi oxirgi 40 yil ichida birinchi marta Amerika neftini eksport qiladi. Bu haqda The Wall Street Journal ma’lumotiga tayanib, “Korrespondent.net” xabar beradi.
Neft yetkazib berish 2016-yilning yanvarida amalga oshirilishi lozim. Kompaniya Texas janubidan qazib olingan 600 ming barrel neftni Xyuston shahridagi terminaldan yuklashni rejalashtirmoqda.
AQSh Kongressi 40 yil davomida amal qilgan neft eksporti taqiqini bekor qilgandan so‘ng, bir haftadan kamroq vaqt o‘tib, eksport amalga oshirilishi to‘g‘risida ma’lum qilindi. Ushbu neftni Niderlandiyaning Vitol Group kompaniyasi qo‘lga kiritadi.
Nashrning ma’lum qilishicha, neft Shveysariyadagi neftni qayta ishlash zavodiga yetkaziladi. U yerdan dizel va yoqilg‘ining boshqa turlari Shimoliy Yevropa davlatlariga yetkazib beriladi.
Amerika neftining Yevropaga eksport qilinishi Saudiya Arabistoni, Rossiya va Eron neftini yetkazib berishda raqobatni yuzaga keltirishi mumkinligi ta’kidlanmoqda.
Izoh (0)