Toshkent shahrining olti tumanidagi mahalla va mavzelarda namuna tariqasida videokuzatuv moslamalarini o‘rnatish va ulardan foydalanish boshlandi. Bu haqda Toshkent shahar hokimligida 23-dekabr kuni bo‘lib o‘tgan matbuot anjumanida ma’lum qilindi.
“Videokuzatuv moslamalarini o‘rnatish va ulardan foydalanish ishlari Toshkent shahrining Mirobod, Mirzo Ulug‘bek, Uchtepa, Shayxontohur, Chilonzor va Yakkasaroy tumanlarida namuna tariqasida boshlandi”, — dedi Kommunal foydalanish birlashmasi bosh direktori Ilhom Mahkamov “Daryo” muxbiri savoliga javob berarkan.
Qayd etishlaricha, Toshkent shahrida mavjud ko‘p qavatli turar-joylarga, mahalla va mavzelarda tashqi videokuzatuv moslamalari tijorat banklarining imtiyozli kreditlari evaziga xususiy uy-joy mulkdorlari shirkatlari (XUJMSH) yoki ushbu faoliyat bilan shug‘ullanish istagida bo‘lgan boshqa korxonalar tomonidan o‘rnatiladi.
Ularni o‘rnatish va ulardan foydalanish xizmatlari uchun to‘lovlar aholi bilan tuziladigan shartnomalar asosida bir necha yillarga bo‘lingan holda, amalga oshiriladigan ekspluatatsiya xarajatlari to‘lovlari bilan uyg‘unlashtiriladi.
Eslatib o‘tamiz, Toshkent shahar hokimi 11-dekabr kuni “Toshkent shahridagi ko‘p qavatli turar-joylar, mahalla va mavzelarda videokuzatuv moslamalarini o‘rnatish ishlarini tashkillashtirish chora-tadbirlari to‘g‘risida”gi farmoyishni qabul qilgani haqida xabar berilgan edi.
Izoh (0)