Reuters Vladimir Putinning kenja qizi deb ataydigan Katerina Tixonova va Rossiya prezidentining qadrdon do‘sti Nikolay Shamalovning o‘g‘li Kirill Shamalov 2013-yil fevralida Sankt-Peterburg yaqinidagi “Igora” tog‘-chang‘i kurortida to‘y qilgan. Bu haqda agentlikka besh nafar manba ma’lum qilgan, deb yozadi “Vedomosti”. “Igora” Putinning boshqa qadrdon do‘sti Yuriy Kovalchuk va Kipr offshoriga tegishli.
Ular, shuningdek, to‘y qanday o‘tganini ham gapirib berdi. To‘yga 100 ga yaqin kishi kelgan. Tantana suratlari ijtimoiy tarmoqlarda paydo bo‘lmasligi uchun mehmonlardan mobil telefonlarini olib qo‘yishgan. To‘yda xizmat qilgan suratkashga Tixonovaning rasmini ko‘rsatishganida, u kelin shu qiz bo‘lganini e’tirof etdi. Kurort xodimlaridan biri ularni soqchilar tantana bo‘layotgan joyga yaqinlashishga qo‘ymagani, biroq ular bu Putinning qizining to‘yi ekanligini bilganini aytdi.
Putin esa Tixonova qizi ekanligini na rad etadi, na tan oladi. 17-dekabr kungi katta matbuot anjumanida “RBK” muxbirining “‘Innopraktika’ jamg‘armasi rahbari Katerina Tixonova sizning qizingizmi?” — ma’nosidagi dangal savoliga prezident javob bermadi. U o‘z qizlari haqida xavfsizlik kabi nuqtai nazarlardan gapirib o‘tirmasligini ta’kidladi.
“Ular biznes va siyosat bilan shug‘ullanmaydi. Ular hech qayerga burnini suqmaydi”, — dedi Putin.
2015-yil yanvarida Reuters agentligining manbalari anonimlik sharti ostida, Moskva davlat universiteti bilan ishlaydigan “Milliy intellektual taraqqiyot” jamg‘armasi rahbari Katerina Tixonova Rossiya prezidenti Vladimir Putinning qizi ekanliginitasdiqlagan edi.
Putinning ikkinchi qizi — Mariya Fassen, Reuters ma’lumotlariga ko‘ra, Moskvadagi Endokrinologiya ilmiy markazida ishlaydi.
Izoh (0)