Rossiya hukumatining Xorijiy investitsiyalar bo‘yicha komissiyasi Alisher Usmonov va Ivan Tavrinning “YuTV-xolding”i tarkibiga kiruvchi “YuTV-menejment”ning “CTC investments”ni sotib olish bo‘yicha iltimosnomasini ma’qulladi. Bu haqda “Vedomosti” xabar bermoqda.
“CTC investments”da “CTC Media” xoldingining operatsion biznesi ajratilgan. “YuTV-menejment” ushbu kompaniyaning 75 foiz ulushini uning xorijiy aksiyadorlari — Shvetsiyaning MTG (37,9 foiz aksiyalarga egalik qiladi) kompaniyasi va NASDAQ birjasida sotilayotgan aksiyalar (36 foiz) egalaridan sotib oladi.
Qolgan 25 foiz ulush “Rossiya” banki egalaridan biri Yuriy Kovalchuk va uning hamkorlariga tegishli Kiprning Telcrest Investments Ltd. kompaniya hisobida qoladi. 2014-yil kuzida Rossiya parlamenti qonunchilikka o‘zgartirish kiritib, chet elliklar OAVning 20 foizdan ortig‘iga egalik qilishini taqiqlagandi. “CTC Media” aksiyadorlari vaziyatdan chiqishning biznesni sotishdan boshqa yo‘lini topa olmadi. “YuTV-xolding”dan tushgan taklif birinchi va yagona bo‘ldi.
Avvalroq “CTC Media” “YuTV-xolding”dan tushgan taklif shartlarini ma’lum qilgandi — TV-xoldingning 75 foiz biznesini sotib olish uchun xaridor 200 million dollar naqd pul taklif qilgan. Bu pulning 150,5 millioni darhol to‘lanadi, qolgan 50 millioni esa 2016-yil 1-fevralga qadar saqlab turiladi. Agar “CTC Media”ning operatsion va investitsiyaviy faoliyatidan kelayotgan pul oqimlari tomonlar kelishuvidagidan kamroq bo‘lsa, xaridor keyingi to‘lov miqdorini kamaytirishi mumkin.
Izoh (0)