“O‘zbektelekom” aksiyadorlik kompaniyasining hamkorlari tarmog‘idagi ishlar 12-oktabrdan beri uzluksiz davom etmoqda. Bu kompaniya matbuot xizmati tomonidan 30-noyabr kuni e’lon qilingan axborotdan anglashiladi.
“‘O‘zbektelekom’ AK hamkorlari tarmog‘ida ishlar olib borilishi munosabati bilan 2016-yil 5-yanvarga qadar taqdim etilayotgan internet xizmatlari sifati yomonlashishi mumkin”, — deyiladi kompaniya xabarida.
O‘z navbatida, O‘zbekiston bozoridagi boshqa yirik internet-provayderlar, xususan, Sarkor Telecom kompaniyasi “O‘zbektelekom”ga asoslanib 2015-yil 1-dekabr — 2016-yil 5-yanvar kunlari internet sifati pasayishi, Skype, Viber, Telegram kabi ommabop messenjerlarning faoliyati yomonlashishi mumkinligidan ogohlantirgan.
Qayd etish joiz, “O‘zbektelekom” kompaniyasi 2-sentabr kuni o‘z “hamkorlari tarmog‘ida olib borilayotgan ishlar” sabab internet sifati 1-oktabrga qadar, 12-oktabr kuni 31-oktabrga qadar, 31-oktabr kuni esa 30-noyabrga qadar yomonlashishi mumkinligi haqida ogohlantirgan edi.
Ma’lumot uchun, “O‘zbektelekom” — O‘zbekistondagi eng yirik telekommunikatsiya operatori bo‘lib, u mamlakatdagi internet-provayderlar va mobil aloqa operatorlariga internet-kanallarni ijaraga beradi, internet tarmog‘idan foydalanish xizmatlarini taqdim etadi.
Izoh (0)