O‘zbekistonda 2016—2020-yillarda 40 ta yangi musiqa va san’at maktabi ishga tushadi va 58 ta musiqa va san’at maktabi rekonstruksiya qilinadi. Ushbu maktablarning faoliyatini takomillashtirish haqidagi Davlat dasturi 20-noyabr kuni Prezident Islom Karimov tomonidan tasdiqlandi, deb xabar beradi “Gazeta.uz”.
Davlat rahbari qarorida ta’kidlanishicha, 2009—2014-yillarda O‘zbekistonda 278 ta musiqa va san’at maktabi foydalanishga topshirilgan. Yangi Davlat dasturi musiqa va san’at maktablari tarmog‘ini bundan keyin ham rivojlantirish, jumladan, musiqa va san’atning boshqa turlari bilan shug‘ullanishni istovchi qishloq hududlaridagi bolalarni yanada ko‘proq jalb etishni ko‘zda tutadi.
14,7 ming ta’lim oluvchi uchun mo‘ljallangan yangi va rekonstruksiya qilingan maktablar yangi o‘quv jihozlari va anjomlar, musiqa asboblari, kompyuter va boshqa texnikalar bilan ta’minlanadi.
Yangi Davlat dasturi ijrosini muvofiqlashtirish uchun bosh vazir Shavkat Mirziyoyev boshchiligida respublika komissiyasi tashkil etildi.
Izoh (0)