4-noyabr, chorshanba kechki payt Pokistonning Lahor shahridagi plastik paketlar ishlab chiqaruvchi Plastic Industries fabrikasi binosi qulashi oqibatida qurbonlar bo‘lganlar soni 20 kishidan oshdi. Hodisa sodir bo‘lganda to‘rt qavatli fabrikada 150 dan ziyod ishchi bo‘lgan. Bu haqda Lahor politsiyasi vakili Muhammad Usmon ma’lum qilgan, deya xabar beradi “TASS”.
“20 dan oshiq kishining jasadi topildi, 85 kishi qutqarilgan, ko‘pchilik vayronalar ostida qolgan. Jabrlanganlar kasalxonalarga yotqizildi, ulardan 15 kishining ahvoli og‘ir. Qutqaruv ishlariga 300 dan ortiq odam, shuningdek, muhandislik qo‘shinlari jalb etilgan”, — deya ta’kidlagan Muhammad Usmon.
Ma’lumotlarga ko‘ra, nobud bo‘lganlar orasida fabrika egasi Muhammad Ashraf, shuningdek, 10 yoshgacha bo‘lgan bolalar ham bor. Mahalliy aholining aytishicha, fojiaga 26-oktabrda ro‘y bergan va 272 nafar pokistonlikni hayotdan olib ketgan zilzila tufayli fabrika binosida paydo bo‘lgan yoriqlar sabab bo‘lishi mumkin. Korxona rahbariyati ularni ko‘rmaslikka olgan va shikastlangan poydevor ustida fabrika yuqori qavatlarini barpo qilishda davom etgan.
Eslatib o‘tamiz, oldinroq mazkur hodisada 10 kishi nobud bo‘lgani bildirilgandi.
Izoh (0)